પાલનપુર ખાતે કલેકટરશ્રી આનંદ પટેલના અધ્યક્ષસ્થાને અનુ. જાતિ પેટા યોજના અમલીકરણ અને તકેદારી સમિતિની બેઠક યોજાઇ
અરૂણોદય ન્યૂઝ.
પાલનપુર કલેકટર કચેરી ખાતે કલેકટરશ્રી આનંદ પટેલના અધ્યક્ષસ્થાને અનુસૂચિત જાતિ પેટા યોજના અમલીકરણ સમિતિ અને જિલ્લા તકેદારી સમિતિની બેઠક યોજાઇ હતી. બેઠકમાં અનુસૂચિત જાતિઓના વિકાસ માટે વિવિધ અમલીકરણ અધિકારીઓની કચેરી દ્વારા જૂન-૨૦૨૧ અંતિત કરવામાં આવેલ કામગીરીની સમીક્ષા કરવામાં આવી હતી. જેમાં પ્રધાનમંત્રી આવાસ યોજના, મનરેગા યોજના, કુટીર ઉધોગ, પાક વ્યવસ્થા, બાગાયત અને પશુપાલન, વીજળીકરણ અને પાણી પુરવઠાની યોજના, વન વિભાગ, આઇ.ટી.આઇ. દ્વારા આપવામાં આવતી તાલીમ, સમાજ સુરક્ષા અને સમાજ કલ્યાણ કચેરી દ્વારા કરવામાં આવતી યોજનાકીય કામગીરીની વિસ્તૃત સમીક્ષા કરવામાં આવી હતી. બેઠકમાં કલેકટરશ્રીએ કહ્યું કે, અનુસૂચિત જાતિના લાભાર્થીઓને સરકારશ્રીની વિવિધ કલ્યાણકારી યોજનાઓના લાભ સરળતાથી મળે તે માટે તથા તેમને કોઇપણ પ્રકારની મુશ્કેલીઓ ન પડે તે માટે સમાજ કલ્યાણ કચેરીમાં હેલ્પડેસ્ક શરૂ કરવામાં આવે અને તેની લોકોને જાણ કરવામાં આવે. તેમણે અમલીકરણ અધિકારીઓને લક્ષ્યાંક પ્રમાણે યોજનાકીય લાભો સત્વરે લાભાર્થીઓને આપવા જણાવ્યું હતું.
અનુસૂચિત જાતિ જિલ્લા તકેદારી સમિતિની બેઠકમાં જૂન-૨૦૨૧ અંતિત ત્રિમાસિક ગાળામાં નાગરિક હક્ક સંરક્ષણ અધિનિયમ-૧૯૫૫ તથા અનુસૂચિત જાતિઓ અને અનુસૂચિત આદિજાતિઓ (અત્યાચાર નિવારણ) અધિનિયમ-૧૯૮૯ હેઠળ બનેલ બનાવોની સમીક્ષા, તાલુકા કક્ષાએ તકેદારી સમિતિઓની નિયમિત બેઠક બોલાવવી, અસ્પૃશ્યતા નિવારવા માટે ડ્રાઇવ ચલાવવી, એટ્રોસીટીના કેસોમાં ફરીયાદ નોંધવામાં વિલંબ ન કરવા સહિતના મુદ્દાઓની ચર્ચા કરવામાં આવી હતી.
બેઠકમાં ધારાસભ્યશ્રી જીગ્નેશભાઇ મેવાણી અને શ્રી નથાભાઇ પટેલ, જિ. પંચાયત સામાજિક ન્યાય સમિતિના ચેરમેનશ્રી દિનેશભાઇ પરમાર, સભ્યો સર્વશ્રી રાજુભાઇ ડાભી, શ્રી મુકેશભાઇ શ્રીમાળી, શ્રી વિજયભાઇ ગાંધી, જિલ્લા ગ્રામ વિકાસ એજન્સીના નિયામકશ્રી આર. આઇ. શેખ, અ. જા. નાયબ નિયામકશ્રી એચ. આર. પરમાર, નાયબ પોલીસ અધિક્ષકશ્રી પંડ્યા, જિલ્લા સમાજ કલ્યાણ અધિકારીશ્રી એ. એમ. છાસીયા, સરકારી વકીલશ્રી સી. જી. રાજપૂત, જિલ્લા આયોજન અધિકારીશ્રી ઝાલા, ખેતીવાડી અધિકારીશ્રી પી. કે. પટેલ, બાગાયત અધિકારીશ્રી જે.બી.સુથાર, મદદનીશ વન સંરક્ષકશ્રી બિન્દુ પટેલ સહિત અમલીકરણ અધિકારીઓ અને સમિતિના સભ્યશ્રીઓ ઉપસ્થિત રહ્યાં હતાં.
No comments:
Post a Comment