ખારેકની ખેતીથી બે પેઢી સુધી આવક મેળવી શકાય છે --ખેડુત શ્રી વશરાભાઇ પટેલ થરાદ

બાગાયત વિભાગની સહાયના સથવારે જિલ્લાના પશ્વિમ
વિસ્તારમાં ઘણાં ખેડુતો બાગાયતી ખેતી તરફ વળ્યાં


થરાદ તાલુકાના ગગાણા ગામના ખેડુત શ્રી વશરામભાઇ પટેલ
ઇઝરાયેલી ખારેકની ખેતીથી માતબર આવક મેળવે છે


ખારેકની ખેતીથી બે પેઢી સુધી આવક મેળવી શકાય છે
--ખેડુત શ્રી વશરાભાઇ પટેલ 
(માહિતી બ્યુરો, પાલનપુર)
         સયમની સાથે નવા નવા પરિવર્તનો આવતા હોય છે. આજથી થોડાક વર્ષો પહેલાંની વાત કરીએ તો બનાસકાંઠા જિલ્લાના પશ્વિમ વિસ્તારમાં વરસાદ આધારીત ખેતી હતી. વર્ષ-૨૦૦૮માં નર્મદાના નીર આવ્યા પછી આ વિસ્તારની કાયાપલટ થઇ હોય એમ કૃષિ, બાગાયત, પશુપાલન સહિત સંખ્‍યાબંધ ક્ષેત્રોમાં આમૂલ પરિવર્તન આવ્યું છે. ખેડુતોની આવક અને સુખાકારીમાં વધારો થતાં તેઓ પોતાના બાળકોને ઉચ્ચ શિક્ષણ અપાવતાં થયાં છે જેના લીધે સાક્ષરતા દરમાં પણ નોંધપાત્ર વધારો થયો છે. ભૂતકાળમાં પછાત ગણાતા બનાસકાંઠા જિલ્‍લાએ હવે રાજય, રાષ્‍ટ્ર અને આંતરરાષ્‍ટ્રીય કક્ષાએ જવલંત સિધ્‍ધિઓ પ્રાપ્‍ત કરી છે. જે રાજ્ય સરકારના વિવિધ પ્રજા કલ્યાણના અભિયાનો અને વિકાસલક્ષી નીતિને આભારી છે.
           રાજય સરકારના કૃષિ મહોત્સવ અભિયાનથી ખેડુતોની જાગૃતિમાં નોંધપાત્ર વધારો થયો છે. કૃષિ વૈજ્ઞાનિકોના માર્ગદર્શનથી ખેડુતો હવે ચીલાચાલું ખેત પધ્ધતિ છોડી આધુનિક પધ્ધતિ કરતા થયાં છે. વૈજ્ઞાનિકોના માર્ગદર્શન મુજબ ખેડુતોને એ વાત પણ સમજાઇ છે કે બાગાયતી ખેતી દ્વારા સારી આવક મેળવી શકાય છે. રાજય સરકારના બાગાયત વિભાગની સહાયના સથવારે જિલ્લાના પશ્વિમ વિસ્તારમાં ઘણાં ખેડુતો બાગાયતી ખેતી તરફ વળ્યાં છે. જિલ્લામાં હાલ ૨૦૦ હેક્ટર વિસ્તારમાં ટીસ્યુ કલ્ચર ખારેકની ખેતી થાય છે. ટીસ્યુ કલ્ચર ખારેકની ખેતી કરવા માટે પ્રતિ હેકટરે ખેડુતોને રૂ. ૧,૫૬,૨૫૦ ની સબસીડી આપવામાં આવે છે. એક છોડે રૂ. ૧૨૫૦ની સબસીડી અપાય છે. આ જિલ્લાના ખેડુતો બાગાયતી ખેતી તરફ વળતાં જિલ્લાના બાગાયતી પાક વિસ્તારમાં ઉત્તરોત્તર વધારો થઇ રહ્યો છે. જેનાથી ખેડુતોની આવક અને સુખ-સમૃધ્ધિમાં વધારો થશે તથા સમાજમાં સુખાકારી આવશે.
             આજે આપણે વાત કરવી છે થરાદ તાલુકાના ગગાણા ગામના ખેડુત શ્રી વશરાભાઇ રાસંગભાઇ પટેલની કે જેઓ ઇઝરાયેલી ખારેકની ખેતી દ્વારા માતબર આવક મેળવી રહ્યાં છે. શ્રી વશરામભાઇ પટેલ પાસે કુલ-૨૦ એકર જમીન છે. તેઓ ખેતી અને પશુપાલનનો વ્યવસાય કરે છે. હાલ ચોમાસાની ઋતુમાં તેઓ ખારેકનો પાક લઇ રહ્યા છે. શ્રી વશરાભાઇ પટેલે જણાવ્યું કે, અમે વર્ષોથી ચીલાચાલું ખેત પધ્ધતિથી ખેતી કરતાં હતાં. જેમાં ઉનાળા અને ચોમાસામાં બાજરી, જુવાર તથા શિયાળામાં રાયડો, એરંડા, ઘઉં, જીરૂ વગેરે પાકોની ખેતી કરતાં હતાં. તેમણે કહ્યું કે મને શરૂઆતથી નવું જાણવાનો શોખ છે એટલે મેં ડીસા કૃષિ વિજ્ઞાન કેન્દ્ર, દાંતીવાડા કૃષિ યુનિવર્સિટી અને ડીસા ખાતે આવેલ આત્માની ઓફિસનો સંપર્ક કર્યો. મારા દિકરા રામજીએ પણ એગ્રીકલ્ચરમાં ડિપ્‍લોમાં કર્યુ છે. આત્મા દ્વારા યોજાતા પ્રવાસમાં કચ્છમાં આવેલ મુંદ્રા ખારેક સંશોધન કેન્દ્રની મેં મુલાકાત લીધી. ત્યારબાદ વર્ષ-૨૦૧૩-૧૪માં ૫ એકર જમીનમાં ઇઝરાયેલી બરહી જાતિની ખારેકનું વાવેતર કર્યુ છે. રૂ. ૨૫૦૦ ના ભાવે ૨૫૩ ખારેકના છોડ લાવી વાવ્યા છે. જેમાં બાગાયત ખાતા દ્વારા સબસીડી પણ મળી છે. એક છોડ દીઠ રૂ. ૧૨૫૦ વત્તા મજુરી પેટે રૂ. ૨૫૦ એમ કુલ-૧૫૦૦ લેખે રૂ. ૨,૫૨,૦૦૦/ની સબસીડી મને મળી છે. તેમણે કહ્યું કે, ખારેકના પાકમાં ચાર વર્ષથી આવક આવવાનું શરૂ થાય છે. ખારેકના છોડને વાવ્યા પછી ૭૦ વર્ષ સુધી આવક આપે છે અને ૧૦૦ વર્ષનું આયુષ્‍ય ગણાય છે. ખારેકની ખેતી પર્યાવરણ જાળવવા પણ અનુકૂળ છે. આમાં કોઇ દવા આપવામાં આવતી નથી. એના થડમાં ફક્ત છાણીયું ખાતર અને પાણી જ આપવામાં આવે છે એટલે સંપૂર્ણ ઓર્ગેનિક પણ કહી શકાય. ખારેકના રોપાઓ વચ્ચેની જમીનમાં આંતરપાક તરીકે જીરૂનું વાવેતર કર્યુ હતું. જેમાંથી રૂ. ૪ લાખની આવક થઇ હતી. તેમણે કહ્યું કે ખારેકને વાવ્યા પછી ચાર વર્ષે આવક શરૂ થઇ જાય છે. ગયા વર્ષે રૂ. ૮ લાખની ખારેક વેચી હતી. આ વર્ષે સીઝન ચાલુ છે રૂ. ૧૦ લાખની આવક મળવાની ધારણા છે. આ ખારેક બજારમાં હોલસેલના ભાવે રૂ. ૫૦ અને છૂટકમાં ૮૦ થી ૧૦૦ રૂપિયે કિ.લો. માં વેચાય છે. એક વાર ખારેક વાવ્યા પછી આ ખેતીથી બે પેઢી સુધી આવક મેળવી શકાય છે. આ ખેતી ખરેખર આ વિસ્તાર માટે અનુકૂળ અને સફળ છે તેમ શ્રી વશરામભાઇ પેટલે જણાવ્યું હતું.